آتکگ اَنت گرانیں نوبتءُ جنگانی بہار
دیم پہ ماتکوھاں رپتگ اَنت ملّیں سرمچار
گوانگ جتگ ڈیہہءِ مادریں ھاکءَ بزّگی
جہہ جتگ پیراں بستگ اَنت ورناھاں کتار
مُلک بلوچانی پہ ھلو ھالواں نہ رؤت
مشکتی حلوایے نہ اِنت رندانی دیار
داں جھان ھست اِنت نام مئے دھرءَ ھست بیت
وھدءِ دلبندءَ نقش اَنت مئے پیشی یادگار
کَہنءُ کُمبانی آپ مئے آپءِ زُم زُم اَنت
چو بہشتءَ اَنت مئے چراگجاءُ ملگزار
زِر چو آدینکءَ درپش دنت روچءِ دیگرءَ
گوات منی ڈیہہءِ باڑئی بھنگانی ملار
دژمنءَ داشتگ چمّ وتی پہ مئے بُندرءَ
کوہ بہ بنت یا کہ تیاب دپءِ سورآپیں ڈگار
یا بہ بنت دارءُ ڈنگرءُ بوچءُ ڈوکءُ ڈل
گِل بہ بنت یا کہ بندنءِ زبریں ریگبار
کلمتی چھبّءَ جوڑ کنت بانءُ بادگیر
بُرز ماں باتیلءَ شنگ بنت رنگانی گُبار
شپدرے مانیت پہ وتی پدریچاں نلنیٹ
کُبلیں پاسگاھاں بند بنت آجوئیں تلار
پہ بلوچانی پُشپداں دنیا تنگ بیت
الّما روچے مئے گوں بدواھاں جنگ بیت