جِی ھتلی، جِی ھتلی
او ھتلی!
دُگنیائی ءِ بَنیادمی زیبا نہ اِنت!!
مَں مَنگھانی آکِبت زِردے گُمانءَ بَستگ اَنت
دَابانی اَلماسیں ھَیال، اَلم نہ اَنت اَچ دیگر ءَ
پِگر ءِ کِیاس ءَ گیش کَنت۔
کَے پَہ زَمانگ شاھد اِنت؟
کَے ماں، گُمان سَھرا بِہ بیت؟
کَے دیگر ءِ رَندا کپ ایت
اَچ بِیدِھانی بِیدھاں!
ژانگ اَنت ھَرانی لِٹک ءَ، وَھدے تَوان ءَ بَستگ اَنت۔
پَھم ءُ گُمان ءَ ھاکُم ءِ
کَلپیں زَمانگ چَاپ جَنت۔
مَھگونگیں شانتؤؔ گُش ایت !
”جِی باث تَرا اللہ نِزر“
نَوں چاکر ءِ چارچَمّ شُتگ!
نِودبَندگ ءِ دَھر ءَ جَتگ ،
گُل بِی بِی ءَ سَر چِست کُتگ،
گُل بِی بِیءِ زَھمے زِراب تَالان اِنت میری بَندن ءَ
دَاگے پَہ شاہ ءِ ھِینچگَ ءَ
او بَادِشاہ ، جِی بَادِشاہ !
گَار اِنت تَھی وَاک ءُ تَواں،
گُٹ گیر ءِ تَو گَوں مَنگھاں۔
بِاریں بِگَوش دانکہ کَد ءَ آچار چَنڈے ماں زِر ءَ
تیر سُپتگیں جِوناں دَئِے ،
دانکہ کَدین، پَہ ڈِیکی ءَ،
چُنت مادرے ”آہ“ ءَ گِرے
سَاہ ءَ گُھارانی گھیں ،
تاں کَد دِل ءَ دُنیائِی او زیباھی ءِ ھاجت بِہ بیت،
تاں کَد ھَیالانی کُنر گَوں چُوٹِکَاں بِے بِورْ بَنت،
تاں کَد کُمیتانی کَتاہ ھاموشی ءِ تَام ءَ چَشّ اَنت ،
تاں کَد مَنی چَکاس ءِ بَاج ھِونے تَلیت ماں مَلگُزار!
تَاں کَد مَن ءَ ارسیں رَگام ،
گِلّوتَگی گِین سَارت دَنت،
سِولیں نِزام گَوں کَندگ اَنت
ھَروچ واب ءَ پاد کَنت ،
کَاشُل تھی سَازیں نَد ءَ ،کِے مُجَتی اِشکِیل کَنت،
کَد پَہ گُماں بِے جَارْ بئے، امروز بَڈی چَادر ے !
شیرخان شیری گُرگاں جَنت پہ مَڑاہ ءُ مَنگھہ اَنت
ما پَہ مَڑاھاں رَپتگ اِنت ،
مارا کَسے دِلرنج نہ اَت،
پَما بَھشتی چَارِک ءِ ھَوراں گَیابیں سَاچِتگ
پَما شَھیدی لِکِتگ، نُور اَنت ھُداے ھاکُمیں
جِی مَے مُکُدَر سَاھبیں ،
جِی مادر ءُ گُھارانی اَرس !
ساھیل نِود ءِ مَپَلی ،
جِی ھتلی ، جِی ھتلی