جند ءِ وتی پجارگ ءِ جہد ءَ سر ءُ چیراں

جند ءِ وتی پجارگ ءِ جہد ءَ سر ءُ چیراں

آدینک ءَ تئی چارگ ءِ جہد ءَ سرءُ چیراں

دست ءَ دِگہ ھچی کہ نہ بوتگ دل ءِ سوک ءَ

یاتاں وتی نزارگ ءِ جہد ءَ سرءُ چیراں

انچو گشگ انت پر گوں تلاہ ءَ سر ءُ سنگ انت

لوگ ءَ وتی ماندارگ ءِ جہد ءَ سرءُ چیراں

بِلّے کہ نِزوراں شتگیں ساہ نہ بیت بالا

انگت بلے اُفارگ ءِ جہد ءَ سر ءُ چیراں

زرد تراتگ انت سرپتگیں پُلانی گلیں تاک

من بلبل ءِ شیزارگ ءِ جہد ءَ سر ءُ چیراں

بانور چو جنوزام ءَ گدان ءَ وتی نشتگ

سالونکے ءِ سنگارگ ءِ جہد ءَ سر ءُ چیراں

ھر بندہ ماں امروزءَ وتی نیک ءُ بد ءَ زانت

قاضیؔ من تئی دارگ ءِ جہد ءَ سرءُ چیراں