شِنگ کن:
دگہ راھے دگہ رھبندے پہ وت جوڑ کناں
دگہ لوگے دگہ شھر بَندے پہ وت جوڑ کناں
گَرمیں پُلکانی تہ ءَ تَپتگیں ریکانی سرءَ
ھونکّ ءُ سارتیں دَر بَندے پہ وت جوڑ کناں
بے بلایئے اگاں واھگ تئی بہ دْروہ اِیت من ءَ
دگہ دِلبُرّ ءُ جگر سِندے پہ وت جوڑ کناں
چو من ءَ شات نہ بنت اِنت تئی کُبلیں بروان
تئی بچکندگ ءَ سوگندے پہ وت جوڑ کناں
کَجّ اِتگ دل منی زَھر شانیں کمان ءِ تیراں
چہ دل ءِ ھوناں جگر بندے پہ وت جوڑ کناں
بلکیں بے پُشپد ءُ بے گڈّ مِراں نام ءَ تئی
وتی گالانی تہ ءَ رَندے پہ وت جوڑ کناں
لیب کنت بِلّے گوں اَرواہ ءَ منیگ ءَ ھانؔل
سیؔد ھر روچ دگہ زِندے پہ وت جوڑ کناں