شِنگ کن:
کٹینگ ءَ انت جلیں تراک ءُ شورھاں سرگوات
گلاب ءِ پل ترا گلزمینی امرے بات
پہ تومشان ءَ زر انت میسک پل ءُ ھونی گبار
دچار کپتگ انت مرچیگیں ھمسپر باندات
ودارءِ امر کئی تھت ءِ پادگ ءَ درتکگ
آ لنٹ ءِ موسمی بچکندگ ءَ من ءَ رد دات
نی سرزھانی چراگ گوانزگانی دیمدار انت
آ ھون بھر کن انت ھنیاں کن انت ھیرات
اے جنگ اشرپ ءِ درا ءِ کمرئیں شنزے
اے جنگ پلے تئی مھرءِ ساھگ ءَ بہ ردات
منی زمین ءِ بدن زندگی ءِ بوہ ءَ کنت
سروزے کلبرے ھورے شپانکے ءَ گوں بات
تنیگا چم نہ تْراکینتگ ات دل ءِ پڈّاں
نواب شورھی تْراکاں منی کدوہ بُن دات