کھیبانی پری

تچوکیں آپ ءِ پُشت ءَ کِشک رَند اِیت

گنوک اِنت دل کہ پتّو پَھر بند اِیت

کھیبانی پری سر چادر ءَ بَے

نہ سگّاں کسّے بالاد اِت بگند اِیت

تئی وش زیمریں گالوار ماں کُلّ ءَ

منی ریشیں دل ءَ بنداں چہ سند اِیت

مہ شِنگین مِسکیں مَلگوراں مہ شنگین

پمن جمبر گمانی سْیاہ بند اِیت

کَپ اِیت کَبگ چہ وتی کْرام ءُ کھیباں

چو دابانی گُل ءَ راہ ءَ بِگند اِیت

نہ دل پمّن نہ دْراھیں زندمانی

مہ گندات اِنت کسے چیزے کہ من دیت

منی بھت ءَ سیاھی ءَ مانپوش اِیت

وتی گْواپاں اگاں مھدیم رَند اِیت

من اِشک ءِ بْرھنگیں ڈَنّ ءِ میاراں

گم ءِ جُڑ پمّن بے ساھار گْرند اِیت

مکن جُست ءَ شپانی روچ تھار اَنت

کہ دیدگ گونمن ءَ سھتے نہ نِند اِیت

من کول ءُ ندر منّاں پہ مُریؔد ءَ

کہ گونمن یک بَرے ھانؔل بکند اِیت

نہ بیت اِنت اوؔمر ءُ ماؔھو ھمک کَس

سیؔد کس پہ کسی اَھداں نہ نند اِیت