کئی دِل

نہ زانت اِنت گُل کہ بدھال اِنت کئی دِل

زَر اِیت پہ آئی ءَ سے سال اِنت کئی دِل

من ءَ وَ بے دِلیں نامے پِر اِت کُت

چو مُرگ ءَ نوں بگْوش بال اِنت کئی دِل

اگاں موہ بیت بگر جُستے چہ زِرد ءَ

پہ شادانی ءَ ڈُکّال اِنت کئی دِل

کہ ناھَکّ ءَ وت ءَ ماں اَنگراں جنت

گنوک ءَ چوش اَبدال اِنت کئی دِل

پتو سِندان ءُ کاران ئِے نہ زاناں

جَز ءُ مُروارد ءُ لال اِنت کئی دل

من ءَ را جنت پیگوراں نہ زانت اِنت

کہ نیکیں ءُ بَدیں پال اِنت کئی دل

بچار اِت واھگ ءِ پاکیں کتاب ءَ

گوں ھونیں ٹپّاں سَرگال اِنت کئی دل

نہ زانت اِنت مَرگ ءُ زِند ءِ کُلّ ءِ بانک

کہ دَرد ءُ مَرگ ءِ ربّال اِنت کئی دل

نہ تْرسیں واھگ ءِ دریا ءِ نیلّیں

زِر ءِ گْورمانی اومال اِنت کئی دل

اگاں ھونکّ اِنت کُورُم شَر بچار اِت

کہ داگ ءُ مُنّواں نال اِنت کئی دل

بچار ھانؔل کہ دَرد ءِ مِھنتانی

جَگر سِندوکیں چِّیھال اِنت کئی دِل

مروچی ھِنّی اَنت ماھیں گُل ءِ پاد

نہ زاناں کہ لگت مال اِنت کئی دِل

جِگر بَنداں گوں دوتکگ گونڈلاں تئی

تئی ٹَھلاں چہ بے ھال اِنت کئی دِل

دَوار جاہ اِنت تَپ ءُ رَنج ءُ گَمانی

سیؔد بے دوست ءَ وژھال اِنت کئی دِل