شِنگ کن:
بیا اُو منی میریں بلوچ! گردے کجا چو بزگءَ
دردے منءَ گیرت مں دِلءَ، پر تئی سبکیں جزگءَ
سارتیں زِمستانی شپے، گوریچ و سیاھیں چِلگے
تو لوچ و لنگڑ کپتگے، سارت بستہ چو اِستیزگءَ
تئی کپتگیں ڈونڈءِ سرءَ، مچنت کلاگ و گزان
سِندنت، وَرنت گوشتان تئی تولگ چِپیم پہ مَزگءَ
ٹھگیں کِتابی لچگان، ارگ سریں پر درابگان
سِرین بستگ و مچ بِیتگنت، تئی گنج و مالءِ دزگءَ
اِیشءَ نہ زاناں برات منی! نادانے لیے تو یا لگھور
ٹِکیں حبر اِیشہت گوئشاں کٹہت نہ بِیت پد کزگءَ
بَاور کنہت بِراتاں منی! مَرچی ھما قؤم زندگ ئنت
پد کِزگءَ عیبے گبرنت تیرانی گرمیں شنزگءَ
دردے نصیرءَ مں دلءَ چو زاری و پِریات کنت
درمانءَ دردانی کنہت ٹپانی میلہت گزگءَ