نازینیں وتی لال ءَ را
لکھ مرادیں کسان سال ءَ را
وش بوئیں زباد مال ءَ را
دُرگپّیں شکرگال ءَ را
لولی، لول منی لال ءَ را
عمرءِ گُڈ سری مال ءَ را
شپ گرند و گروکاں گرندت
اللہءِ در ءَ چہ پنڈت
پیر و مرشدان ءَ گوْندت
غوثءِ لنگران ءَ چنڈِت
لولی ، لول منی لال ءَ را
پیرپنڈیں کساں سال ءَ را
اللہ ٹُوہ بکنت مئے ساہ ءَ
ندرپہ چندنیں ورنا ءَ
شیر بیمیں بروت ڈالشا ءَ
زھم و اسپرءِ واجہ ءَ
لولی، لول منی لال ءَ را
نوک موجیں کساں سال ءَ را
ندر آ ساعتءِ پرچوشی
کیفی پیالہ آن ءَ نوشی
سیری نرمگان ءَ پوشی
کوچءِ تیرکمان مردکوشی
لولی، لول شکرگال ءَ را
تنگو دروشمیں لال ءَ را
زامات بچ بیتیں بنگیں
ناکوءِ وتی پُرننگیں
ناکوءِ جنکّ ماہ رنگیں
آسکی گردن و پونز چنگیں
لولی، لال زباد مال ءَ را
نازینیں وتی لال ءَ را
بچّوں تنگویں مرکب دار
راجءِ زہم جن و ڈیہہءِ یار،
سردار چاکر ءَ چو زیبدار
لکھ بخشے بیت و ڈاتار
لولی، لال منی لال ءَ را
خیرواہ و بلوچ سیال ءَ را
بیت یک شائرے دُرگپتار
قوم ءَ را بدنت ھوش و سار
گون طنز و شِگان و تیھار
چست بنت ساوڑی مثلِ ہار
لولی، لول منی لال ءَ را
لکھ مرادیں شکر گال ءَ را
گُشنت وھد ءَ گوں دودستاں سلام اِنت
ما رنداں چش کنگ پماّ حرام اِنت
زمانگ بِرّببیت، چپ اچ راہ ءَ مئے
چِمر پونزءِ جناں ، اے مئے کلام اِنت