مکن

مَن کدی گْوشتگ من ءَ گْرانیں گَماں بار مکن؟

واھگ ءُ دوستی ءَ چمّن گِلگدار مکن!

آزگیں ٹَپّاں دل ءِ مارم ءُ زیمیگ مکن

دوستی ءِ داتگیں سوگات اَنت ایشاں گار مکن

چو مہ بیت کَسّے تئی جند ءَ میارگ بکنت

منی لاچاری ءُِ گپّاں ماں دپ ءَ ھار مکن

بِلّے بے سار ءُ ھَنوشاں پہ اُمیتے جْوانیں

مِنّت واراں کہ مہ ٹوھین ءُ من ءَ سار مکن

پہ منی چارگ ءَ گوناب تئی پولنگ نہ چنت

سھتے ءِ نِند ءُ نْیاد ءَ من ءَ چَمدار مکن

کہ پہ ھچ ڈول ءَ من ءَ شات نہ بوتگ ھانؔل

لال من ءَ مُپت ءَ پرے گپ ءَ میار بار مکن

دیر اِنت تئی زومّ سریں چوٹیلّاں منی دل دَج اِتگ

مَھپراں پیچ مدے بے دَمیں سْیہ مار مکن

بھتوں واب اِنت منی آھاں سرءَ ساھیل کُتگ

وتی ملگوراں مَہ شنگین من ءَ بے سار مکن

ناگُمانی کسے چم زَھمے مہ شان اِیت پہ تو

گال ءُ گپتاراں سیؔد چو رِد ءُ کِتّار مکن