دیریں چداں شُتہ
پرہاد دل ءَ کُتہ
بھت ءَ منا جتہ
ماہکان مجاں شتہ
دوستیں منی ساہ انت
منی دردانی دوا انت
شمے دستاں گرا ں
زاری کناں
منا برے منی دوست ءَ
نہ سندی کس دلی دوستاں
نہ کنت کس بے خدائی چو
پہ دیدارے بہ گندان یے
نہ بیت انت بے وفائی چو
منا چنت سال پورائیں
منی دوست چمن دورائیں
منی دوست سہب ءِ استاریں
منی دوست چاردہی ماہ انت
منارا شرّی ءَ یاتاں
وتی کول ءُ کرار سوگند
منارا شرّی ءَ یاتاں وتی
زھگی ءِ گند ءُ نند
شتاں ماہ ءِ سرون ءَ لیب ءُ گوازی کُت
اگاں آ زار بوت من گریت ءُ راضی کت
کنے بزگ منارا سر کن ات دوست ءَ
دلانی واھگ ءُ اوست ءَ
منا برے منی دوست ءَ
منا چے دور نہ بوتگ سہتے واستہ
جہان زانت انت
شکور اِت مچ ہر سال ءَ
شگنزءَ واب کپت ایں ما
شت انت بروار
تلائیں مچکدگ ُسندانی باھوٹ بوت
گرم برنجانی ھوشگ کُت
ءُ لھڈ دات گژن آسر کُت
گوں چگردی پُل تئی دُتکک سجینت آں من
سریگ ءِ لمب ڈک دات
وارت قسم سوگند
ترا چے دور نباں ھچبر
من پلانی تلب لوٹ ات
کشارءَ دُرچک وراں ودّاِت
ھما روچ ءَ منی دلبر چداں لڈّاِت
بلوچاں راھگوزی آں
او مسلماناں
منا برے منی دوست ءَ
منی پیریں پت ءَ وس کت
کہ گوں تو سر گراں بیاآں
شت ئے تو دور
من تتک آں بے وس ءِ پیم ءَ
تئی دُمب ءَ
ھما روچ ءَ منا چے سست ءُ گستا بوت
تاں چم تتک آں
گبارے اتک
جبین ءَ آہ ءُ زارے اتک
کوارءَ بست وتی ارسانی نیل ایں زر
زمین ءُ آزمان یک کت
ترا چار اِت
ھدائے مردماں
ایمانداراں ۔۔۔من بے وس ءُ گاراں
شمارا رھم نہ روت پمّن
منا برے منی دوست ءَ