ہمنچک ءَ تاں دست رسیت من جنگ کناں
ہمنچک ءَ تاں ساہ سُریت من جنگ کناں
وتی سرءَ چہ سر گوازاں
وتی من جانل ءَ گشاں
اے بیگہ ءَ امانتے کناں
تئی ھلک ءَ روچے سر گراں
ءُکمیں ننداں مادر ءَ دل ءِ توامیں رازاں ھال دیاں
زمین ءِ نام ءَ نمدی ءِ روان دیاں پہ آجوئی !!!!
زمین مادر انت منی
زمین جانل انت منی
زمین سنگت انت منی
زمین محبت انت منی
دمانے من کماش ءَ الوتی ھمے گوشاں
منا چے رند مہ پروش تو وت ءَ
بس جانل ءَ تو سیاھیں چادرے سرا بدے !!!
بگندے دیستءَ تو
ھمے سرا اَت شاری ءَ
ھمے سرائیں دُرّی ءَ
ھمے سرائیں ماھو ءَ
تئی نشار چہ سرمچارے ءَ چے کم نہ انت
بلوچے درد وارے ءَ چے کم نہ انت
من لوگ ءِ درپ ءُ داراں
شرّی ءَ گوں سیل کناں
دریگ ءِ لمب ءَ روک کناں چراگے ءَ
کہ باندا کس مہ پولیت شاکر ءَ وتی
دمانے ننداں سنگتانی مجلس ءَ
من درائیں ھمبلاں ھمے گوشاں
کسانی ءَ را یات کنے وتی
جی ءُ لیب ءُ گوازی آں
آکور ءِ جان شودگاں
شمارا یات بگندے بیت
امبوکانی سر چنگ ءُ زمین ءِ توک ءَ کل کنگ
کلونٹ زرتگ انت گوں واد آپ مینتگ انت
شمارا بلکیں یات بیت
چیر بوئی شپانی مئے یلہ چری
او سنگتاں منا چے پد
دمانے ءَ ملور مہ بے
چہ گلزمین ءَ دور مہ بے
اے رُخصتی منارا زندگی بدنت
اے رُخصتی زمین ءَ آجوئی بدنت
کوہ منارا گوانک دنت
من سر گراں روان کناں
وتی پہ محبت ءَ بلان کناں