شِنگ کن:
منا چہ ارواح ءَ دوستِرئے تو، تئی رضا ھم
نہ وش اِنت شیطان چہ منا، ءُ گشے خُدا ھم
دو جُون اِتیں بُندر ءَ دوئینانی ساہ یک اَت
نہ اَت گُمان ءَ کہ کئیت روچے ما بَئیں جتا ھم
اَڑ اَت اِے دود ءُ ربیدگانی جھان ءِ کُوَھنیں
پِڑ ءَ دَرآتکاں من بے سِلاح ءَ ءُ سر دَرا ھم
چہ دَرداں تئی داتگیں مَنا ھچ نئیت تاھیر
نے کار کنت اِش دَوا ءُ دَرمان نے دعا ھم
کدی من پَدکِنزتاں وتی کُرتگیں قراراں
چیا تو لیک اِت منا جَھان ءَ گوں بے وفا ھم
اِے جنگ ہپت پُشتی وارث ءِ حقّیں پُشپد ءِ اَت
تو گیش ءُ گیوار ءِ بیت ئے مُنصِف، کُت ئے ریا ھم
تو ساحرؔ دنیا ءِ دروگیں رھبنداں درنیاتک ئے
نپ ءَ وتی ”شَرّءُ گندگ“ ءَ را کُت ئے روا ھم