شِنگ کن:
مارا ساراں گوں شمار بوگی نہ انت
دل گنوکی بکن سار بوگی نہ انت
من چہ آئیءَ، آ چہ من دلرنج انت
گندگءَ گند و گدار بوگی نہ انت
جمری شینک پدی رپت و شتنت
موتک کرگشکاں بہار بوگی نہ انت
مرچی مونجان و گمیگ انت موسم
بلکیں کونجاناں کتار بوگی نہ انت
داں اے بے مهریں زمانگ است انت
مهرءِ راجدپترءَ گار بوگی نہ انت
وت ماں وت سیل اتگ انت گندگ و شر
دائم وسیگ و نشار بوگی نہ انت
زاناں نیمونءَ گبارانی بکنت
ماهیکانءَ ده و چار بوگی نہ انت
بلئے گواتءَ گوں سفر کنت قاضی
سنچءِ سیمرگءَ شکار بوگی نہ انت