کسہ
مروچی کسہے منا گیر کیت اِنت
یک کوہنیں عکسے دیما کیت اوشتیت
من ءُ مروارد نامیں یک جنئکے
کسانی ءَ دوئیں دیشتار بوتاں
مزن بوتیں کجا ما گار بوتاں
دل ءِ درگاہ قرآن ءِ پاکیں آیات
پہ چشیں ہمساہگی ءَ ساہ اُوں حیرات
آئی ءِ آ زندگی موج ءِ تہا اَت
منی پت میتگ ءِ کوہی شپانک اَت
آ ئی ءِ پت مشکت ءِ فوج ءِ تہا ات
ہشت ءُ ہفت سالاں بوتیں یکجاہ
شپانی پاساں بوتیں دیراں آگاہ
شتیں آ بُلکیں ناز جان ءِ لوگ ءَ
اِش کت چونیں کسہ راست ءُ درٛوگ ءَ
چتوریں گپ جت چوٹیں اپوگ ءَ
بن دنت دلبریں مہناز ءِ لوگ ءَ
پاک ءُ سلہیں بے دروریں دور
وفا ءِ سنگ پُرشتگ زندگیں دور
کسانیں سنگکاں سندات بستہ
زر ءِ لمباں شپانی دتکی کت
بُتکے زرتگ ءُ دُتک ٹہینتگ
زری موجانی ریخاں بار بوتاں
مزن بوتیں کجا ما گار بوتاں
منی پت میتگ ءِ کوہی شپانک اَت
مدامی بستگے حمیل لانک ءَ
تُشے ہورماگ ئے بستہ چادر ءِ لمب
صباہاں گوں بُزاں رپتگ آ کوہاں
رمگ ءَ گوں دچار گپتگ یک گُرک
لدیگے رستریے زانت فرق ءُ درک
پسّءَ چے بوت تاراج ہلک ءُمیتگ
لدیگ ءَ گردن سند کت ہلک ءُکوچگ
بُنا رِتکاں درئیں گندیمی ہوشگ
پت ءَ گور دات برچانک ءَ یک تیرئے
گرک کپتہ زمین ءَ ساہ ئیے سستہ
ہمے نیام ءَ کماش ءِ ترشترئے ءَ تیر ءَ لگئت
رمگ ترینت ءُ آورت وہدے ہلکہ
مزن مری ءِ جار شنگئت ماں ہلکہ
کماش تورینتگ ات وشنامیں دانکہ
کماش ءَ زہر ءُ زرشانی کت ہلکہ
برو بیار ات ہمے ہلک ءِ شپانک ءَ
دو ازرانک! گوردئیانے من پہ لانک ءَ
گنوک انت واجہ کاراں پجہ نیاری
لدیگاں جنت ءُ گارکنت بے انان ءَ
لدیگاں جنگل ءِ پجہّ نیاریت؟
لدیگ واہند انت آ برزیں قلات ءِ
کلاکولی برزپاگاں نہ چاری
پت ءَ گینسارتے آورت کش ات اوپار
انجیر درٛچکے ءِ بے پُل ءَ پش اِت
شپانکی ءَ وتی بوتگ آ بے حال
شپانک است انت بلوچی ءِ بن ءُمال
سرا بست ئے پت ءَ ایرانی دزمال
وتاسے کت قطار ءَ ٹکیں تیراں
کماش ءِ بستگیں اوتاگ ءَ سربوت
کماش ءَ برانز گپت ءُ حبر کت
کماش ءَ پندلے سازاِت یک نوکیں
گریب ءُ بزگ ءِ حقاں زروکیں
شپانک مئے میتگ ءِ پہک ءَ گنوکیں
لدیگ ءُ رستراں کئے کُشت کنت انت
لدیگ مئے حاکم انت اے جنگلانی
لدیگاں بِل وتی کار کنتیں
لدیگ کہ بادشاہ انت اے لدانی
لگوری پہ بلوچاں زنڈیں عیب
ہمے ہلک ءِ کماش ءَ جنگے سازات
پت ءَ بہتام ئے بست ءُدیم دات جیل ءَ
بلوچے اے نہ انت یک بہہ دارئے
شپانکے اے نہ انت یک سرمچارئے
سلاہ بنداں وتی باہوٹ کنت انت
ربیدگ زندگ مان ات بے تماہ ءَ
جنگے چست کنت پہ شازیہ ءَ
کشیت گرکاں زمین ءَ رستریناں
لانکے بستگ ءُ جنگ ءَ تیاریں
بلوچ ءِ آ نصیب بیگوٛاہی ءَ ات
یک پاد ئیے کینسر ءِ نادراہی ءَ ات
چونیں سرمچاریں پیراں مرد
معراج اُشترانی پژمیں زین ءَ
بز ءِ ہڑ ءَ گوں چاریت آکبت ءَ
ہمے جنگ ءِ کہ ماکردار بوتاں
مزن بوتیں کجا ماگار بوتاں
من ءُ مروارد نامیں یک جنئکے
کسانی ءَ دوئیں دشتار بوتیں
مزن بوتیں کجا ما گار بوتیں
(2013حب،بلوچستان)