شِنگ کن:
مئے حیالانی تہا کہ گُژنگیں آہو چَر اَنت
شینک ءُ استال دیگرانی چو چراگ ءَ زیمر اَنت
سُتکگیں شہر ءِ غماں کہ شانتلے سوتے بِہ جنت
گوش بازار ءِ ہمے پہ بینگیں اُوست ءَ زَر اَنت
کوش مِسکانی اگاں نوں دُژمنی پہرے بِہ کنت
ایوکیانی شپ ءِ دمبُرتگیں ڈیوا مِر اَنت
آزمان ءَ گُلزمینے داگ ءُ تیروکاں کُتگ
انگہ درٛچکاناں مروچی نوبت ءِ زیور پِر اَنت
شپ گِدارانی سفر کہ زعفران شنگاں بِہ کنت
مُرگ سُہبانی در ءَ زیمرتگیں حالے بَر اَنت
ہَستیانی تُنّ ءِ اَندوہ دیدگاں گیشتر بِہ بنت
بُرّگ ءَ راہانی روچ ءُ زَگریں ساہگ دَم بَر اَنت
پُرٛشتگیں زند ءِ متاہاں نزّ کار اَنت دامن ءَ
بِلّ ذاکرؔ سر گنوکاں انچیں جاہے سر گِر اَنت