کوچگ ءُ زیداں دلبریں چاران ءَ روئیں
سربگرلالی پہ گلیں خاران ءَ روئیں
کہ تیار مہریگ انت دل ءِ ماہیں ہتلی
کوش کشیت ءُ نود دگہ ترزئے ءَ شلی
آسک ترڈنت سید پزوراں کوہ سر ءِ
زم زمی آپئے درکپیت شہجوئی سر ءِ
ماں تلاردیماں نشتگ انت سی سو ملگیں
کوہ بنی کبگ انت زاعفران شوداں بانزلاں
پہ سمی ءَ جنت انت چو سروز مستیں توکلی
کوش کشیت ءُ نود دگہ ترزئے ءَ شلی
رود ماشکیلی دریا ءِ رخشان ءَ کپیت
سبزیں برشونکی کوہ ءِ سیاہان ءَ گوزیت
ریخ جمپ بنداں آ مزن تل ءِ دامن ءَ
ملک بلوچی انت ءُ مئیار جلیں جُلگہ یے
ہرگورا سیل کن زیبائیں رب ءِ قدرتاں
صوت الہانیت پہ ہما مہرانی نلی
کوش کشیت ءُ نود دگہ ترزئے ءَ شلی
جنت ءِ جلوہ اتکگ انت لالیں کوچگاں
مکئی رستگ لہمیں کرپاسی ہوشگاں
مچکدگ سرسبز بیٹ ماں لوش ءُ میوگاں
آ شریفہ ءُ شیرکنیں زردان ءُ کروچ
کہربہ کیاسکونک فشت اتنت سبزو روچ بہ روچ
یات دل ءَ نوروز ءِ قلات کیت انت بیبلی
کوش کشیت ءُ نود دگہ ترزئے ءَ شلی
سانگ ہڑپروشی موسم ءِ زلفانی دہمال
بیست من غلہ بیت گرانڈ رخشانی پہ تو
ملکت ءُ مال ءُ زیوراں زیراں زرگراں
سید ءُ شے آں نیک دعا ہمراوں کناں
لباں بندانت انت روچ اوشیت نیزہی
کلہ ءَ روت انت میتگ ءِ ماہیں گرانملی
کوش کشیت ءُ نود دگہ ترزئے ءَ شلی
آ چراگجاہ ءُ جنگلاں کائینت نوک بہار
سبزکیں گُربست، آسک کاہ، آلونج ءُ مگیر
آپترونک یِلّشہ، گیسو ءُشمشیں کہور کاہ
رستگ اَنت پرپک موسم ءِ لنٹانی وراک
مہر ءِ حرماگے، ریگن ءُ لدگشت سبزین تاک
ماچنیں دانچیک پہ لسہیں گیوار ءَ گلی
کوش کشیت انت نود دگہ ترزئے ءَ شلی
سرشپی معراج ہلوت آں اسرار باز کتگ
گوشتگے شعرئے بیا نویس مہر ءِ یاتگار
پہ شکار رپتاں بّڈوئی کور ءِ آ کنار
پتکگ ماہیگ ءُ سیم جت ریخانی سرا
آ پُرانی ءِ آرت ما تر کت چادرا
شاعر اِنت معراج جنتر ءَ زہیرانی ڈّلی
کوش کشیت ءُ نود دگہ ترزئے ءَ شلی
(1999،سیندک،بلوچستان)