شِنگ کن:
ناگمانی چِست بنت درکاینت اُپّارگ منی
من دپ ءَ داراں نہ بیت دل لَھڑجنیں دارگ منی
تئی گماں گاراں منی رنگ ترّ اِتگ زرد ء زلُور
گْران کپتگ دُژمن ءُ دلواھاں پجّارگ منی
ھِچّ ترا بادر نہ کنت پمّن تُشے بزّگ نہ بیت
دُژمناں جوریناں اوشتارینگ اِنت نارگ منی
چاردہ اَلّاھیگیں شپ تئی ھاترءَ سُھبوں کتگ
دیمترءَ گونمن نہ بیت ھچ رنگ ءَ دل دارگ منی
چمّ پہ مھر ارسان ریچ اَنت لَھڑ جنت دل پہ زھیر
دوست سھڑین اَنت مَنءَ ءُ من کُداں بارگ منی
چہ وت ءَ ھِچّی نہ ساراں نی من ءُ بھریگ منی
باوری گپّے نہ اِنت اِے گْرمپگ ءَ شارگ منی
پہ گدارے گُڈّ چَہ من کسّے بگندئے پہ وت ءَ
باید اِنت مرگ ءَ چہ پیسر یک برے چارگ منی
ساہ منی دَر نئیت ھانلؔ تاں نہ گنداں من ترا
دُرّیں نام ءَ تئی گِراں بیت شھادت ءِ آرگ منی