اوبلوچ بیچارگ مبو چماں تو مدار
اچ بلوچانی گوٛستگیں کرداراں پچار
ملک پرنگی ءَ برتگ ات کرت ات بے نوا
نیت ترا جاہ نے تئی درد ءَ را دوا
ڈیہہ تئی بُرت اِش پیشتر ءَ ڈیہہ ءِ دشمن ءَ
نوں تئی دینا وٹ کنٹ ہورتیں سوچن ءَ
گلزمین پراہنت نندگ ءِ جاگہ نیست ترا
آسمان برز انت لگگ ءِ راہبند نیست ترا
چو پہ آسرد کار پہ اگار ءَ تی چون گوز اَنت
نے کہ تئی حشکیں چارگ ءَ قسمت سوز بنت
سال ءُ ماہ درٛاج اَنت روچ ہرسال ءَ تو مریج
بند وتی میان ءَ بدئے ارماناں بریچ
قسمتء واہند بو وتی دنیا ءِ تہا
یا بہ مِر پر تو زیات تراَنت موت اچ منت ءَ
داشتگ اَنت چم تو مزن لاپیں مستراں
چست بنت آ پہ ڈیہہ ءُ راجانی تورٛواں
واجہاں زرت ءُ کرتگ اِش ڈیہہ ءَ را بہا
سوار انت بالیگا گرد اَنت بہ ڈیہاں جاہ پہ جاہ
میر ءُ سرداراں گوں مزن لاپیں واجگاں
ہرکس ءَ زرتگ وتی بند کرتگ زبان
آ کن انت عیش ءُ زنڈ بنت گامیش ءِ وڑ ءَ
آ نہ گندنت اچ پدا ملک ءِ گڑ بڑ ءَ
میر ءُ سردار خان تماشاہانی تہا
کپتگ انت سوچنت آ اِدے راجی جیڑہا
آ وتی عیش ءُ موٹل ءُ جہازاں سوار بنت
باگ ءُ ماڑی ءُ کرشی ءُ کونچاں پہ زرنت
آ کجا راج ءِ بزگ ءُ خواری ءَ مر انت
قوتے داراں نئے جن انت چم کش مر مرنت
داتگ اش ملک ءَ را اگر لوٹاں بنڈل ءَ
سوار بنت گرد اَنت آ وتی شاہی موٹل ءَ
نے شمئے مجلس وش بیت آ دان ءَ پچار
نے شمے ڈیہہ اِش وش کیت نے کہ اے ڈگار
گشتگ انت ملک ءَ چارتگ اش راج ءَ را کدی
کوہ ءُ دشتانی حالت ءِ است اش سرپدی
کوہ ءُ دشتانی گردگ ءَ چوفان ءَ کپنت
لوگ شما نندانت آشمئے دیم ءَ اچ جہینت
آ کدی گرد انت بزگیں راجانی جاہ
نے شمئے مرگ ءِنے شمئے زند ءِ ہست متا
گردگءِ،جاگہ آوانی جوانیں یورپ اِنت
وپسگ ءِ جاگہ آوانی ماڑی ءُ کوٹانی سرٛپ اِنت
خان نصیرؔ خان اَت احت شمے لوگانی دپ ءَ
مجلس ءُ کرت اش گوں شما روچان ءُ شپ ءَ
نیت تگرد ءَ مئے ٹپر ءُ کونٹاں پتر اَت
مرک ءُ زند ءَ مئے آ شمئے ہر روچ حاضر اَت
یا خدادادؔ کہ قید بند ءَ پہ راضی ات
یا بلوچؔ خان ات سردیگ آئی گوازی اَت
نوں شما دل داشتگ پمے میریں منگہاں
آکن اَنت کارے کلنت وتی عیشی بمہگناں
چم شما داشتگ چاراِت سردار ءُ سربراں
چم شمے کور اَنت چار اَت شما پیشی سنگراں
گرشما خون ءَ نمب کنت رنگی بیت ڈگار
زوت دیئنت پرچما سر سبزیں سگار
اے منی گالان بزور قاصد دیر مدار
برہمودا کہ مئے بلوچ نشتگ دیم دار
درد کشیت اچ دل ءَ جو شینی پہار
پروشتگ کاری کرتگش بنداں گوں سہار
آدمیؔ زہیران ءَ بہ بر آرا سربکن
تو بگوش حقانیؔ ترا دیم دات اے سخن