گوں جذبہ و جوش ءَ تران کناں
ماعہد و قسم پیمان کناں
ھونان ءَ وتی ریچان کناں
جانان ءَ وتی قُربان کناں
بُرز نام، بلوچءِ شان کناں
ماعہد کناں پیمان کناں
آزات بلوچستان کناں
چو مرد ءَ بنداں سرینان ءَ
اچ میان ءَ کشّاں زھمان ءَ
چو شیر ءَ زوراں گامان ءَ
گوں پاد ءَ پروشاں کوھان ءَ
چو دریاب ءَ طوفان کناں
ماعہد کناں پیمان کنان
آزات بلوچستان کناں
او شوانگ و بگجت آزاراں
او بزگ و پہوال، ناداراں
او بزگر و مزور، لاچاراں
او گُژنگ و بے شام بیماراں
ما نوکیں زندے جوان کناں
ما عہد کناں، پیمان کناں
آزات بلوچستان کناں
اچ راج ءَ کشّاں سرداراں
اے گرک و نواب و خونخواراں
اے ڈنگ جنوکیں سیاہ ماراں
اے قوم بلوچءِ غدّاراں
کھڈّ چیر زمین ایشان کناں
ماعہد کناں، پیمان کناں
آزات بلوچستان کناں
چو ایران ءَ لمبوک کناں…،
چو مصر ءَ آچے روک کناں
اے زند ءَ سوچن پھوک کناں
چو چین ءَ زندے نوک کناں
بیا اِت وتن ءَ شادان کناں
ماعہد کناں ، پیمان کناں
آزات بلوچستان کناں