روانگی

دَریگءَ ڈّن بے شُمار بوجی اَنت

ءُ بوجیانی ہر تَکءَ

مُسافِرانی جُمپ نِشتگ اَنت...

ودارءَ ننگرانی کَّشگءِ...

اے مان دیانءَ اَتکگ اَنت گَّجءِ سارتیں جنگلءَ

اِشانی چّم پُر اَنت برف-رنگیں ٹپ ءُ تراولءَ

اے آشنا نہ ینت تلاریں کندوءِ مُج ءَ جلءَ

بلئے اشانءَ روگی اِنت

بقولِ ناحدا اے کاگد اَنت

ءُ کاگدانءَ روگی اِنت

تلاریں کندوءَ چہ پنجہ چِل گام دِیر!

اِدا اے تہنکائیں مردکار لوٹیت

کسے جُست بِہ کنت

"کدی

روانگیءِ سبزیں لیٹ روک بیت؟ "

ہمے دمءَ، مسافرانی سرینءِ وارءَ آپ کئیت

ءُ ننگرانی کّشگءِ حیال نوک بیت

ہمینچوکءَ

گوں ننگرانی کشگءَ

مسافرانی گَج ءُ کپ

تیابءَ خیرباد کنت

روانگیءِ گُڈی ساعتاں...

دریگءَ نِشتگیں

اے مَردَکار ءِ ہفت پُشت یاد کنت