شپ ءَ سر بگر روچ نا مہربان اِنت

شپ ءَ سر بگر روچ نا مہربان اِنت

زمین اِنت ، زمان اِنت، نہ کس پَہمیان اِنت

ہمک رنگ چیریں چو روچ ءَ نشان اِنت

شپ ءَ سربگر

تو گندئے کہ دزّاں جتگ مال واجہ کماشانی دیم ءَ

تو گندئے کہ ہیکّانی عاروس اِنت کلمانٹیں گْواشانی دیم ءَ

تو گندئے کہ چوگان بیت روچ ء رَحمان لاشانی دیم ءَ

شپ ءَ سر بگر

تو گندئے پہ زرّ ءَ وتی مزہب ءَ راه ءُ دین ءَ بہا کنت

تو گندئے گل ءَ بلبل ءَ شانتل ءَ یاسمین ءَ بہا کنت

تو گندئے دل ءَ دلبر ءَ دلبریں گلزمین ءَ بہا کنت

شپ ءَ سر بگر

تو گندئے کہ ایمان ءِ دیم ءَ رسول ءُ حدا بہر بہر اَنت

وپادار یکے گنوکیں دلانی وپا بہر بہر اَنت

حُدابند یکے زمین ءُ زمان ءِ جدا بہر بہر اَنت

شپ ءَ سر بگر

تو گندئے کہ زردانی مہر ءُ وپاہاں پہ شاہیم تور اَنت

تو گندئے ہمک واہگ ءَ واه ءُ واہداری ءَ نیم تور اَنت

تو گندئے کہ مہناز ءُ ماہلُنج ءُ مہرنگ ءُ ماہ دیم تور اَنت

شپ ءَ سر بگر

ناں کس ظاہر اِنت ناں کسے آشکار اِنت

تواراں چہ کُلیں جہان بے توار اِنت

زمانگ ماں وابانی امبازاں گار اِنت

شپ ءَ سر بگر