تو کہ بیھالی ءِ بَھت ءَ چہ لکیرے سِستہ

تو کہ بیھالی ءِ بَھت ءَ چہ لکیرے سِستہ

ما اوں مرچیگ تئی باندات ءِ امیت ءَ بستہ

پیری ءِ اُزر تئی بینگیں لُنٹانی بھانہ بوتگ

ہر دے اے باتن ءَ ورنائی ھیال ءِ گوَپتہ

تو سَتر موسمی بِچکنداں بِہ شیزار بَلے

من وا زاناں منی آستونک ءِ تہا کئے وپتہ

اے نَگاھاں منا ہر روچ گناہ گار کتہ

اے نِگاھاں کہ حَوَص گونگیں لِزّت سَرپتہ

آ کدی گوں منا ہمراھی ءِ زیمر نہ گوَپیت

آ کہ یاتانی بُلوریں دَر ءُ دمکاں رپتہ

لبز جیڈ اَنت منا جیڈگ ءِ اِمروز ءِ بَلے

جیڈگ ءِ جند منی جیڈگ ءِ رند ءَ کپتہ

بیاکہ ورنائی ءِ برفیں اے شپءَرنگ چِتہ

بیا کہ ورنائی پدا موسم ءِ جنگ ءَ گِپتہ

جی منی دیدگءِ درچگءَ کہ نِوان اِنت اَرسے

جی منی تُنیگیں جیگ ءَ کہ بھارے بَستہ

ھَئو فضل ھامگیں زندے ءُ درآمد موسم

بوسَگ ءِ نود وتی شَنزگ ءِ شان ءَ کپتہ