تو کہ ساھیل، سر ءَ مئے وتی رحمت بکتیں

تو کہ ساھیل، سر ءَ مئے وتی رحمت بکتیں

ما شپ ءُ روچ بہ نِشتیں تئی طاعت بکتیں

چو اگول ءَ اِے چیا گَشتگ اِت اَنت ڈیھ ءُ دَراں

کمّیں دلگوش تو اِشانی اگاں گوں وت بکتیں

ھچ کس ءَ دِل جَمی ءَ کِرّءُ گُوَراں سَراپ نہ کت

ٹِلّیں نابوداں اگاں کارچے ھم ھُرجَت بکتیں

سَربگپتین ایں چہ اِے تَھ زَدگیں امروز ءَ

مارا چار گام تو رَہ داتیں ءُ رخصت بکتیں

دوزح ءَ دِیر نہ ات، اینقدا باگیں جنت!

گِستا اَچ وت ما گناہ ءِ بدیں علّت بکتیں

تَلوس اِت ما پہ چیا مِھر ءِ گلیں ساچان ءَ

تو اگاں شات غم ءُ رَنجانی لِذّت بکتیں

کُت نہ کُت گپّ دپ ءِ پُرّ ءَ اگاں دیوان ءَ

ساحرؔ تو گوش ءَ منی بایدیں ھَلوت بکتیں