شِنگ کن:
تُرندیں گُوَر گِندے گُلیں مھرءِ شریدارءَ جَتگ
من کہ ایر جیگاں منا جِند ءِ گِر ءُ دارءَ جَتگ
بندی جاہ ءَ چو کہ ھَنّی ساپ ءُ سارت اِنت، پیسرا
بے کساسیں سِٹّ ءُ دَؤرے نوک گرفتار ءَ جتگ
مُدّتے ءَ چمّاں گُورتگ ارس لاسیں یک شَل ءَ
نیں دل ءِ جُھلانکیاں دِرینّے ءَ ڈولدارءَ جتگ
لاگریں اُمّیتے ءَ سر کشّتگ ماں ڈوبرءَ
نِژگے مَرچی نزوریں کوھنیں بیمارءَ جتگ
تپسگ ءَ اِنت سرجمی ءَ جان گوں ھجگیں واھگاں
اندر ءَ آسے گشے رنجانی پاھار ءَ جتگ
دھر ءِ پاتراپ کدِّ بوچّے مان نیایَنت ھاتر ءَ
مارا تئی دل رنجی ءِ دل پروشیں ساھارءَ جتگ
نئے کہ وارت میرءِ سَرا روکاں نئے بوشیت کُوَھنگاں
زنڈیں ٹاپارے اَے ساحرؔ، قرن ءِ چمدارءَ جتگ