شِنگ کن:
وتی ارساں من شَلینان ءُ رَواں
اِے دل ءِ ریشاں کُدینان ءُ رَواں
مَرگ ءِ ھمراہ بہ بیت کاسد اگاں
ھُر جَنَگ سَاہ ءَ زِھینان ءُ رواں
من رَواں ھم نہ بَے ایمن کہ تئی
دُژمن ءُ دوستاں سُرینان ءُ رواں
گُل ءِ دیوان ءَ، دَیاراں دیریں
دِل ءِ سوگاتاں رَسینان ءُ رواں
وشّی ءِ نرمگیں بزمانی سرءَ
ترا چہ واب ءُ گُڑینان ءُ رواں
گُڈّ چَہ من بلکیں بیائے کُلّ ءُ
شَکلاں پہ ترا مینان ءُ رواں
زَھر مگر دل! چہ گُل ءِ دیوان ءَ
تئی ٹپّاں ھم کدینان ءُ رواں
اگاں ھانؔل مہ بیت اُمیتانی
اِے کلاتاں من ڈُرینان ءُ رواں
ایمنی ءَ نہ گْوز اَنت روچ تئی
گم ءِ مارتین ءَ سْرپینان ءُ رواں
رنج ءُ اندوه نہ بیت گُڈّ چَہ من ءَ
دلاں شیدائیں تْرھینان ءُ رواں
واھگ ءِ جِند منی ھمراه اِنت
بَھت ءَ لالانی نسینان ءُ رواں
ھانؔل ءِ گْواپاں سَیؔد یات کناں
دْرستیں دیوان ءَ زَرینان ءُ رواں