جی منی راجءِ وش رؤیں بانک
سد ستا پہ تئی زانتکاریءَ
تئی دلءِ درد ءُُ جوزگاں راجءِ
نوک کتگ شر تو نام بلوچانی
کوفی عنانءَ دست ماں دست ئے
صدر بشءِ ہر دانکءَ کت ءَے لبیک
ہؤ بچار ماتانی توئے دردوار
پگرءِ تئی بُرزی آزمانءَ انت
یات منا کسّہ ہُنگ ءُُ لاشارءِ
کہ منا پیریں بَلّیءَ گشتگ
اے مزن کوہانی تہہ ءُُ توکاں
بیتگاں ہنکین سبز ءُُ ڈولداریں
رحمتیں گوارشتاں اجب گورتگ
ہار کتگ شیپ کوراں دلءِ میلءَ
بانرتگ میش ءُُ دنزتگ ہِرّاں
کاشی ئیں کُڈّانی تہا ماتاں
جوان مزن رودینتگ وتی بچاں
یاتگاریں گوں لہمیں نازینکاں
ما ہما اہدانی بُن ءُُ بیہیں
میر جلال خانءِ ما دلءِ میہیں
رند ءُُ لاشارءَ ما دوبہر بیتیں
جنگ دات سی سالءَ جوانمردی
ما ہما شیہانی دپءِ کولیں
داد دئیں دشتارءَ ہزار نازیں
ما وتی کولانی پدءَ زہگءِ
گردنءَ سندیں چہ گہیں جانءَ
ءُُ وتی کولانی پدءَ اوشتیں
جی منی راجءِ وش رؤیں بانک
تو ہما ٹکّانی گہیں پُشپد
میر بلوچانی ننگ ءُُ ناموس ئے
چیزکے ماہءَ چِہ گُشنت ساری
دات گشتانک ءِے پہ دلءِ سوکا
من اگاں کَٹاں چمبری ووٹءَ
باز دیاں درس جاہاں کتاب جوانیں
مُپت کلمان ءُُ کاپیاں شریں
جی منی راجءِ وش روئیں بانک
تو وتی کولاں پہک پراموش ئے
تئی زبان لِلّ اِنت پہ بلوچیءَ
گوں پرنگیاں دست ماں دست ئے
چہ ازل ہونوار انت بلوچانی
تو زَرئے لاپ ءُُ پہ وتی نامءَ
تئی ہیال گولیت میتگ ءُُ ہلکاں
دنت سکین ہر روچ جنکوہاں
مکتبءَ وانیتیں سَبکءَ اے
یل کنئت پیشی گوستگیں دوداں
بیت شمے دیمروہی دگہ دابءَ
نام شُمے جکسیت ہر گور ءُُ کُنڈا
جی منی راجءِ وش رؤیں بانک
مارا بیزار، بوانیں اسکولاں
بس مہ ناول مئے گیرت ءُُ ننگءَ
چاکرءِ ارواہءَ مکن بژنیگ
دیست کلمءِ ما زورءُُ تاگت چے؟
تئی سروکیءَ چِہ پد بی بی
مئے گہار شَر اَنت پہ رَزاں شودی
ءُُ وتی ماتءِ دست کمکیءَ
بلّے چِہ علمءِ زیوراں محروم
پہ اشاں مہرانی قرآن بس اِنت
انگتا حقءِ سیمسرءَ اوشتنت
ءُُ وتی براتانی کش ءُُ کِرّاں
جنگ داراں گوں دژمناں جوریں
داد شاہءِ چو بانکیں گوارءَ
بی بی بانڑیءَ چو نہ ترسوکیں
بَلے سدبرا ہیف انت ءُُ ہزار اپسوز
جی منی راجءِ وش رؤیں بانک
پگرءِ تئی بُرزی آزمانا اِنت
سرپد ءُُ پوہ بیتاں تئی زانتءَ
شر کتگ نوک تو نام بلوچانی
شر کتگ نوک تو نام بلوچانی