ورناہی ءِ پل ءُ بہار زی است اَتاں مرچی نہاں

ورناہی ءِ پل ءُ بہار زی است اَتاں مرچی نہاں

تئی واعدہ ءُ قول ءُ کرار زی است اَتاں مرچی نہاں

پرتو بہارگاہ ءُ بہار، زیدانی وش دابیں سمین

پرمن ہما تبد ءُ لوار زی است اَتاں مرچی نہاں

مئے دزکشیں آ درٛچک ءُ دار، سنگانی آپ ءَ زندگاں

تئی شیشگ ءِ مچھ ءُ ڈگار زی است اَتاں مرچی نہاں

جمپاں سر ئیے نوں کش اِتگ ،سد سال ءِ واب ءَ رپتگ انت

کوہانی پادانی توار زی است اتاں مرچی نہاں

ارساں مدئے بیگوٛاہی ءَ پہ مرچیگیں دنیاہی ءَ

ہمراہ تئی دوست ءُدزگہار زی است اتاں مرچی نہاں

مستیں نگاہاں شر بچار، چار نیمگ ءَ ہشکاوگ انت

رپتگ آ کیفانی ملار زی است اتاں مرچی نہاں

مرچی گم ءِ مٹّ ءُ بدل دزکپت یک ہنچیں جائے ءَ

بچکند ءُ ٹہکانی توار زی است اتاں مرچی نہاں

پلانی ماہئیں مارخ ءَ کدکیت انت ہلک ءِ گندک ءَ

دل گوں زہیراں بے قرار زی است اتاں مرچی نہاں

طفلے ماں شاگیں گوٛانزگ ءَ پہ لیبوئے ءَ سہڑاِتگ

گریو گ دِلانی زار ءُ زار زی است اتاں مرچی نہاں

معراج پہ کئے شعراں گشے ہلک تمامیں لڈّتگ

آسومری آ چم خمار زی است اتاں مرچی نہاں

(2007کیچ،تربت)