وژدلیں دَوراں

وژدلیں دَوراں وَپا کُرتگ کَے ءَ گوں ھمدلاں

جَور کن اَنت گَم ناگُمانی وشّیانی شکّلاں

چو دوبر تیر وارتگیں ٹَپّانی ھون اَنت تازگیں

ھِنّی ءُ گُل سُھر ڈولے دوست بنت ماھیں گُلاں

پْروشتگ ءُ ایرجیگ کتگ کاڑانی بے سوبیں گماں

کَیت یک روچے وتی جُست ءَ کناں گْرانمادلاں

ندر ءُ کولیگ اِش مہ بئیں، اے ٹھل ءُ نازاں چے کن اَنت

جُست کن اِت آ جَور جَوابیں مھگل ءُ ھُور چاملاں

مَن چُشیں سر دپترے راجی نیاں مُپت ءُ مَن ءَ

کُوڑھیں دنیا ءَ ماں بستگ گوں زونڈ ءُ زَمبلاں

کپتگ نوکیں وشّی یے ماں درد ءُ دورانی تہ ءَ

دَست بنداں کہ مکن آسان گْرانیں مشکلاں

ھُور اگاں چَہ ھانؔل ءَ شَرتر بہ بنت کُول اِنت من ءَ

سَد پہ آئی ءِ کَندگ ءِ دیم ءَ نہ زیراں ھمبلاں

گون منی بَھت ءَ ءُ اندوھانی تاموریں شپاں

یک اَشارَتّے چہ آسکی دیدگانی کَنجلاں

یات کاینت مَکّھیں ماتانی بچّیگ تنگھیں

گَر بِگنداں کاڑے ءِ دستاں تلاھیں تلملاں

دل بہ بیت اِنت یار اگاں گونمن پہ لال ءِ ھاتر ءَ

یکّ پہ یکّ گْوازیناں تاھاپ ءُ گیابیں منزلاں

دُرّ ءُ گَوھر کیمتی ءُ لال ءُ مُروارد چِتگ

گال ءُ گُپتارانی جمبر گْوستگ اَنت پمّن شلاں

ھُرمت ءَ گْریتگ پہ تَھلیں زندمانی ءَ سیؔد

کس مہ ریچ اِیت پمّنی نگبھتیں مرگ ءَ تْرونْگلاں