عزیز بُگٹی

منی نام عبدالعزیز اِنت۔ مئیں پِث ءِ نام بَرّی خان اِنت۔ من سوئی ءَ شہ ڈَکِنی پلو ءَ موزئه ءَ 1987 ءَ پیدا بیثگْاں 1990 ءَ ھَلک موزئه ءَ شہ دَر کَپتو سوئی ءَ آتکوں تَہ مئیں پِث ءَ مناں گورنمنٹ پرائمری سکول کِلی رسول بشک ءَ داخل کُثہ۔ مئیں پث باز گریب ءُ نیزگارے اَث پوریھات ، نوکری نیست اثی۔ گُرزان ءَ پہ پَٹ فیڈر ءَ شیِری پلو ءَ مئے وثی سیادانی ڈغاراں راھَکی زُڑتئی۔ گَندیمانی رون ءُ ساریانی رومبی ءُ روناں مئیں پِث ءُ ماث ءَ لَڈ ءُ پَٹ کُت ۔ مناں مئیں کاکا امین ءَ لوغ ءَ کِشت ایش۔ (چاچا امین پذا 2006 ڈیرہ بگٹی ءَ فوج کَشی ءَ من شھید بیثہ۔ ) پرائمری داں من ھمیذ ءَ وانت ءَ رَند ءَ مڈل ءُ میٹرک وانگْی ، گورنمنٹ ھائی سکول اولڈ سوئی ءَ آنسر کثہ۔ 2004 میٹرک ءُ 2008 ءَ ایف اے ، انٹر کالج ڈیرہ بگٹی ءَ شہ پیلوّ کثہ ۔ 2014 ءَ گریجوئیشن کُثہ۔ مئے تَرنڈ ءَ اندر اعلٰی تالیم یافت مَڑ نیست اَث۔ پر مناں کدرتی ھساب ءَ تعلیم درشان کنگْ ءِ مزائیں شوکے اَث۔ ماث و پِث ءِ نیزگاری وجه ءَ شہ مں یک رِد ءَ وانگْی آنسر کثہ ،یدر سِند ءُ بند بیِان ءَ آتکگْ آں۔ 2021 ءَ من موھکمہ ایجوکیشن ءَ جے وی استاد مان آختگْ آں۔ من کہ وثی زِند ءِ دُراھیں بَھرے من ٹیوشن سینٹراں چُکانی وانینگْ ءَ گوازینت ءَ ۔ شاھری شونک مناں کِسن سنی ءَ شہ بیثہ۔ مئیں نانا ءَ بِراث ” علو “ پیر سن ءُ چماں شہ مازوراث۔ ہمانھی ءَ جوانسال ءِ شئیر گوْشت اَنت۔ من دل گوش ءَ گوں اَشکُث انت۔ گُڈ مناں دِھ یک یک دو دو بول گُشگْ ءِ شونک بیثہ بَلے من گُڈ دِھ وث شئیر ھچّی نہ بست اث اَنت ، مناں گیریں مناں مئیں ناخوزاتک مرھوم ھبیب اللہ کہ منی اَمسرو ئِے اث، ہمانھی ءَ دیوانِ غالب کراچی ءَ شہ گِپتی ءَ آڑتگْ اث۔ ھماں کِتاب من اے مڑد ءَ شہ لوٹیث ؤ گِپتہ۔ من وانگْ کہ شروع کُثہ تَہ منی اندر ءَ شہ یک شونکے پیدا بیثہ کہ من دھ شاھری یے کناں۔ در سٹ ءَ من غالب ءَ شاھری ءَ شہ متاثر بیثگ ءُ اردو ءَ نا برابریں، پُرشتگْں ءُ بے وزنیں شاھری یے بُنگیژ کثہ۔اردو شاھری لاف ءَ یک بَرے من وثی تخلص ” خستہ “ ایر کثہ۔ پذا خستہ اِشت ؤ ” طائر “ تخلص بست اث۔ ڈیڈ دو سال ءَ رندا من بلوچی زوان ءَ شئیرانی لِکگْ بُنگیژ کثہ ۔ بلوچی شاھری لاف ءَ من وثی تخلس ” شاھر“ ایر کثہ کہ کِسانی ءَ مئیں لوغ ءَ مَڑدماں مناں رِندی ءُ جوانسال ئمءِ شئیرانی گُشگْ ءَ دیثہ تہ مناں تنز ءُ چَتر ءَ گوں شاھر گُشت ایش۔ مڑدماں مناں گُشت کہ اے دِھ شاھرے دُراھیں روش دھمگْ ایں۔ بَس ہمیذا شہ شاھری نام ءَ ھَند گِپتہ۔ مئیں شاھری ءَ را گوناف ءُ دروشم دیَگْ ءَ منی وثی غربت ءُ نیزگاری ءُ وتن ءَ من جنگ ءُ جیڑواں مزائیں بَھرے زُڑتہ۔ ما کہ ورنا بیثگْوں تَہ ما وثی ملک ءَ من جنگ جن ءُ بَرئے ماھولے ءَ سَر زُڑت کہ دانی داں جُزگْ اِنت من آزات لچه ، دوبند، چار بند ءُ شش بند دِھ باز کمیں گُشتگْ اَنت بَلے منی شاھری یے دل لوٹائی گیشتِر ءَ دستونک ( غزل گوئی) اِنت۔ سالے دو بیث ءَ نیں انگریزی سانِٹ ءَ نمونہ دِھ چی ئے بلوچی سانِیٹ بَستگْ اَنت۔