شِنگ کن:
زبان تھار ماھئے ڈِیوائیں
زباں اِستار ءُ یا ماھیں
زباں باغ ءُ بھارگاھیں
زبان ءَ سینغ ءَ جاھیں
زبان ماتیں بلوچی ایں
زبان ءَ سدبر ءَ جی ایں
منارا مکھیں ماثہ
بلوچی ایں زباں داثہ
بلوچی مئے دِل ءُ جانیں
بلوچی اِزت ءُ شانیں
بلوچی رغ رغ ءَ مانیں
بلوچی دِین ءُ ایمانیں
بلوچی سبز ءُ گُلزاریں
بلوچی لُڑگمیں ھاریں
بلوچی ءَ دِلا داریں
شُمئے تَہ سنگت ءُ یاریں
بلوچی ھال ھوال ءَ جی
بلوچی لَوز ءُ گال ءَ جی
بلوچی گوڑغی پُلے
بلوچی ءَ کہ شالا جی
بلوچی مئے دِلئے آھیں
بلوچی منزل ءُ راھیں
مُداماں مار ءَ ھمراھیں
ھَدیں تَہ راج یکجاھیں
بلوچی باز دِلکشیں
بلوچی بینَغی وشیں
شہ کوہ ءُ چیدغاں سَکیں
یا چو کہ زامُری دَرشیں (درشکیں)
بلوچی وشبوھیں پُلیں
بلوچی مئے دِلئے ھُلیں
بلوچی مَست ءُ سملیں
یا کہ گرانازیں، گرانمُلیں