دل زدگ زندگی ئے زد ءَ چی کنئے؟
ھرچ زبان ھرچ ھبر ھرچ ھیالے بدن
چہولنت کہ ندارگ کجا رپتگ اَنت
کسمت ئیں تُک جنت واھگاں مئے دل ئے
چنچوک واباں کہ ھاگاہ کننت دیدگاں
چنچوک درداں کہ سَر سَر جننت باتن ءَ
دل زدگ زندگی ئے زد ءَ چی کنئے؟
کوٹانی تھے زردیں لیٹانی رژن
زندے سیاھیں شپانی کساس ءَ نہ اَنت
مئے ءُ تئی میان ءَ مارشت درہیں مُرتگ اَنت
تو منی واھگانی تھا چہ درا
منی تئی دیدگانی گِس ءَ یل کناں
دل زدگ زندگی ئے زد ءَ چی کنئے؟
بس منی دیدگاں تئی موجیں ترانگے
بس تئی دیدگاں من تُشے زاھراں
تو منی اندر ءَ کمے پشت کپتگے
من تئی باتن ءَ انگت ھستاں کمے
تو منا چہ وتا سِند واتر بکن
منا ترا چہ وتا سرجمی نو کُشاں
دل زدگ زندگی ئے زد ءَ چی کنئے؟
پیر زالے منی اکس ئے ھمراہ مِریت
تو پدا گاریں مردانی کیمپ ءَ بہ نند
چندے نعرہ بجن لہتے لیکچر بدے
ھستیں وھدے درہیں مرد کائینت پہ تو
تو پدا سلفیانی تھا ارس ریچ
من پدا کیمپ ئے کُنڈے گوں اکساں کپاں
ھیش ٹیگ وھدے کُٹنت تا پمن بیا
من پہ تو یک سڑکی سرا وپتگاں
نیم پشت کپتگاں
گوں سریگ ءَ منی جون ئے ٹپاں بِڈب
دل زدگ زندگی ئے زد ءَ چی کنئے؟