شِنگ کن:
ڈھاڈرءِ جمپ ءُ مُجیں گنداوگ ءَ
کپتگ اَنت کُبّو سرانی
لوگ بس دمب ءِ نشانے زندگ اَنت
ہمسر اَنت قبر گوں زمین ءَ
ریشمیں پاگ ءُ کُلاہ
زیارتانی دِرتگیں بیرک نہ اَنت
میری چوٹو روتگ اَنت
کبّڑ ءُ کوہنیں کہیر ءِ سکّ مریں
مُرتگیں اشکر دل اَنت
ارس سنگ ءِ ریزگ اَنت
ڈھاڈرءِ جُمپ ءُ مُجیں گنداوگ ءَ
نُگرہ ءِ درپ ءُ رزانانی تہا
وھد ءَحونانی شرابے تِنگ اتگ
ما پرچا سر گرگ لوٹیں
شرف شاد
دیار ءُ دُور سریں راہاں
ما پرچا سرگرگ لوٹیں
تہاریں جنگلے دیم ءَ
تہاریں جنگل ءَآ دیم
زِرے گجّ ءُ کپ ءُ مست اِنت
زِرءَآ دیم دشتے ہست
کہ پراہ ءُ دراج ءُ بے گواز اِنت
زِرءَءُ جنگل ءُ دشت ءَ
چیا گاماں برَگ لوٹیں
اگاں مئے لوگ نزّیک اَنت
ما پرچا دور روَگ لوٹیں