زندگی ءِ متاھ
کُنٹ ءُ کُمزوریں چمانی ھُورکیں تلب
پہ تئی لوٹ ءَ تئی شیدا دگہ چی بکنت
چنکس نعرہ بجنت
چنچوک دیوال چاکنگ بکنت پہ ترا
چنچوک پمفلٹ دست ءَ بدات مردماں
شاھدگانی میان ءَ پہ تو لٹ بوارت
کیمپاں نِندوک بہ بیت
جنگ بدات گوں ھما مردماں کہ تئی مردم نھاں
پہ تئی ھاترا مُچی ءَ گوں بئیت
لُچیں نعرھ جنوکانی رَندا بہ بیت
مُپتیں سیاسی سروکانی میان ءَ وتی زانت ءَ پاھو بدات
وتسریں کوم پُرستاں گوں دیوان بکنت
ھرچ آدینگ ءَ نوکیں پُچاں گوں تھنا پہ تئی ھاترا
بئیت لکچر بدات
یا پہ تئی ھاترا
اِش بکنت انچیں بکواساں کہ چَٹ رَد اَنت
دُرست بے مکسداں
زندگی ءِ متاھ
آجوئی ءِ لیوار ءَ چہ پیلوشتگیں مردمانی ھبر
زانتکاریں زمین دوستیں بَچانی گپ
کوم پرستیں سَرانی اڑل داتگیں لیکہانی لکیر
گلزمین ءِ پکیر
اے وڑ ءَ چون باں
چون نزانتکار ءُ نوک رُدیں جُستاں گوں لیگاریں چُکاں جناں
چون نگدانی نوکیں نھالاں کُشاں
چون آس دیستگیں دیدگانی تھا جُنزے پاد اتکگیں سبز ءُ بر بیتگیں جنگل ءَ گار باں
چون "اناں" ءِ لبز ءَ چہ بیزار باں
زندگی ءِ متاھ
کُنٹ ءُ کمزوریں چمانی ھورکیں تلب
تو نزانئے بَلے تئی میان ءَ اے نودربرانی لَڑ ءَ
کس سیاسی نہ اِنت
کس تئی سرجمیں ھلک ءُ بازار ءُ کُنڈانی گپ ءَ نکنت
کوم ءِ نام ءَ گِر اَنت
راج ءِ گپ ءَ کناں
راج تھنا یک گَل ءُ کُٹمب ءِ نہ اِنت
کوم تھنا ھما اِنت کہ تئی لیکہاں گوں تپاک اِنت اگاں
بُزگراں چون کنئے
لَٹ واریں ءُ بے روزگاریں سراں چون کنئے
چہ تئی کشک ءَ جُتا تھنا پہ منزل ءَ پَند بُروکیں اے کاپراں چون کنئے
گوں وتی لیکہاں جنگ ءَ متلب دیوکیں کتابی بَراں چون کنئے
نگد کنوکیں اے نودربراں چون کنئے
چون کنئے آ مُریداں کہ شیداں آں پہ ھانی ءَ بس تئی مننوک نھاں
زندگی ءِ متاھ
من تئی لوٹوک ءُ شیدا پہ تئی ھاترا
جنگ داشتہ بَلے جنگی مردے نھاں
تو وَ زانئے مناں
کہ من تئی گَل ءِ سیاسی سروکانی چماں یک مور ءِ نباں
سیاسی داوا کناں
وتسریں لچہاں گوں وتی وت پرستی ءَ مُلما کناں
فلسفیانی مُچی ءَ سجدھ کناں
زندگی ءِ متاھ
من بَلے انگتہ
ھرچ آدینگ ءَ نوکیں پُچاں گوں تھنا پہ تئی ھاترا
لکچر ءَ اتکگاں
سرکلاں نِشتگاں
انی اے سھت ءَ گوں تئی سوگاتی ءَ
من کتابجاھے بُرزی تبک ءَ کہ سر بیتگاں
ھالتاکانی میان ءَ کہ دیستہ ترا
تو گوں سیاسی بچکی ءَ بچکندگے
من نزانتہ بَلے
پہ زمین زندگیں گَل ءِ زیبائیں یک بَچ یے ءَ
اچ من سِستہ تِرا