جان ءِ من تئی تماھ
ابرمی واھگے وَ نہ اِنت پہ مناں
نہ کہ سِتکے تئی نیمون چماں منی
من بَلے انگتہ
چنچوک کرنانی زنگ گپتگیں وسوساں چہ وتا دَر کُتہ
چنچوک اھدانی ھاجت نہ زُرتہ پہ تو
چنچوک مڈی کماشانی بکشاتگیں پہ تئی ھاترا نیم راھ یل کُتہ
من وتی گوست ءِ بامردیں مھلوکے ءِ ھچ داستان ءِ تھا گون نھاں
پہ ترا من وتا گوں وتی گوست ءِ بندوکیں دوداں چہ گِستا کُتہ
تتکگاں چہ وتی ھستی ءِ جیڑھانی میان پہ تو
سُتکگیں چنچوک گِس
شپ جَتیں ءُ لَگت وارتگیں چنکس دروازگانی بدن
بیم ءَ لرزوکیں دمکانی کوکار ءُ زار
کاپر ءُ کُڈ ءُ بانانی شور ءِ توار
سَردری
لَٹ ءُ کُٹ
زاھ ءُ بَد
تژن ءُ بیھار
ءُ تُرسناکیں ھبر
من دریگانی آ دیم ءَ اوشتاتگیں آسنانی گِلگ
کندگانی کُدگ
زیبناکیں نگاھانی تُرس ءَ مِرگ
چم ءِ وت میتگانی تھا دیستگاں
ھچ نہ گُشتہ بَلے
پہ مناں تھنا تئی آپ رنگیں بدن
آس دابیں تلب
شیر تامیں یک بچکندگی ءِ جَلشک
شپ چکیں زلپ ءِ رَم
مِکیں دلبند ءِ گم
ساہ ءِ زیمر ءُ لُنٹانی ھون دابیں چہر
دیدگاں چہ ریچوکیں شرابی خمار
بس ھمے زندگی ءِ متاھ بیتگاں
من تئی شیدا تئی بالاد ءِ کرچکانی اسلی پکیر
رَد نہ وارتہ چہ جنجالاں بکشاتگیں
من تُشے چہ تئی لوٹ ءِ سما ءَ گِسر انگتہ اوں نھاں
دیمترا اوں نباں
پہ مناں تئی تلب
گوست ءِ دُوداں گوں رنگ داتگیں کسہاں
ھست ءِ رنج ءُ گماں
جنگ ءِ سبب ءَ وجود آؤکیں موسماں
دروگیں بامرد ءُ راجدوستیں مردماں
کلھے دیما تِر اِنت
تو من ءَ چہ منی باز کومی گماں گیشتر دوست بئے
انگت دلجم نھے
دلجمی جان ءِ من
کُپر ءِ دروازگ ءِ دیما اوشتاتگیں جَنڈیں ارواھ ءِ لوٹ
اشکے ھچ مکتب ءِ راھبند ءِ تھا گون نہ اِنت
ایمنی تھنا من
اے زمین ءِ سرے سِنگ ءُ ڈوک ءُ کڈب ءُ کہیرانی شیدائی آں
کوھاں زیارت کنوکیں پکیرانی شیدائی آں
پیریں چمانی ارساں گوں اِشک اِنت مناں
بَلے من سھتے اوں اے جنگے تھا زھم کِش ایت نہ کُت
آس تیرے ندات
نعرھے اوں نہ جَت
انگتہ من بَلے
جنگ آماچیں ھاک ءَ چہ گِستا نھاں
من نہ سِستہ وتا اچ وتی گلزمین ءِ آزیمیں گماں
بَلے پہ من ھزار دروشم اِنت اے زمین
بَلے من لھتے لُچانی زھر ءَ چہ چیزانی انکاری آں
بَلے من باز کس ءَ چہ بیزاری آں
من بَلے پہ زمین ھرچ جاھ ساری آں
بس پمشکہ منی دیدگانی متاھ
من پَرے ھاترا
تئی تماھ ءِ مساپر بہ باں گار باں
اچ وت بیزار باں