کئے شمار کُت کنت بُرزیں استاراں
اندر ءِ درد ءِ کئے کساس ءَ زانت
کس نگندیت '' آ '' گْورتگیں تیراں
منی ڈوبر ءَ پیریں بیتگنت پیوست
زی گُباراں شّر گپتگ ات پیرکوه
ڈیره منی شپ دیما مُجاں سیاہیں
دامن یے کوہی جِکّ جت ءُ نشتاں
مُہر پتات میان ءَ زرت کمرزانی
گپّ جت ءُ کندئت گوں بزیں ریکاں
پول اِتنت بیگاہی پْرشوکیں برْمش
مادریں ہنکیں ءِ پڑاں پْراہیں
شانک وتی داتنت من گیابیں چّم
گوں کُتنت بیبگریں دل ءِ احوال
گوں تلّ ءُ شیپانی بتکُگیں گْوات ءَ
ملکموت چو مستیں لیڑو ءِ داب ءَ
پمّن پیداک اَت چہ پُشتا کوہانی
تْرک اِتنت بمب ءُ شنگ اِتنت شوره
چو دُزّیں شاہین ءَ کُت گُراباں ہینژ
ماسگے بست ءُ ده بَرا پَرّریتک
آکبت چے بیت رند ءَ من ڈیہہ ءِ
گوں وتی دوز واہاں کمر بندیں
من ہشیم گپت ءُ پیکری نشتاں
نشتان گوں سیوائی جوانمرداں
چو نزانت بدواہاں لگوریناں
ما بلوچ ایں ءُ مرگ بہا زیریں
مئے دل نہنگانی پُرشتگیں گْورم اَنت
آہن اَنت ڈیل ءُ کوه مئے بالاد
یک گْورے بـالاچ اَت مزن مرّیں
یک گْورے بْراہمدگ کساں زاتیں
مِکّ اَت چو کوه ءَ دیما نودبندگ
مُچّ اِتنت ورنـا منی چپّ ءُ چاگرد ءَ
بچ منی تنگو ءُ مزار بیمیں
ہون اِش چہ ملّیں دیدگاں پِٹنت
گُلگ اِش چہ کاش ءَ دْراج اِتنت زیبیں
چوٹو اِش زرّیں چو بْرستگیں ساد ءَ
(ءُ) بروت اِش چو ڈنگ جنیں زیم ءَ
بـارگیں میان ئے کشار نکشیں
کُبل اِتنت تیر چو زردُکی گْوبز ءَ
کوپگاں سی تیری کلم گوشیں
دیم پہ دیم بئینت گوں سِیلّیں ہینزیراں
چو رگام گْورتگ گونڈلیں تـیراں
شہم کُت ماں شیپانی تہا گْرنداں
سے شپ ءُ سے روچ داشتگیں جنگاں
کپتـگنت کوہـانی سر ءَ دُمـبال
سُوتکـگنت آساں ایمنیں ارواه
ہر کس زانگ بیت وتی بہیہہ ءَ
دست ءِ وت بکشائیں چتور ڈیہہ ءَ
'' سکیاں بْرات گوں مرکباں کوشتنت
شّکلـیں جنگانی پڑاں بچـیگ
پد نہ کنزنت گوں جُگڑیاں دوزواه
وشّیاں ہاتونیں جنَ نوشاں''
مات دُبر پیداک کننت بچّاں
زندگ ارواه بنت رند چہ مرگ ءَ
ہون شہیدانی پُلّ رودیننت
چون بنت سنگانی نپّس بندیگ
ساہاں کَے ایر دنت ماں اندر ءَ کبر ءِ
لوٹ نہ بنت بندیگ گوں توک ءُ زمزیلاں
نَے ہیال بند بنت سِنگیں زنداناں
سگّ ءُ اوپار ءَ است گشنت ہَدّے
چون بیت چارگ گوں وت ءَ بْرہنگ
وردنی چی یے آس نہ انت روکیں
ءُ رُژن تہاری ءَ چون بیت دزگیر
دْرنگ پُلنگانی بے وسیں گٹّ انت
تولگ ءُ روباہی نہ بنت وابجاه
تو ستر واہندے دو سد لکّ ءِ
بے دل ءُ نیم بُندیں سپاہیگ ءِ
پہ دپ گرئے اسلام ءِ مدام نام ءَ
چِرّک اِت پادا انت وتی بیہی
تئ اندر ءَ واب اِنت ہتوئیں بّکال
مات تئ ہندی ناچویے زانئے
سازگرے پِت تئ بادشاه بختیں
بِیر گرگ لوٹئے چہ منا بلکیں
من ترا لٹّ داتگ کُتگ دیندار
شّری ءَ زانئے چاکریں رند ءَ
جون ئے ماں دلبند ءَ تئ کلّیں
نمازی منی بْرات اِنت ڈیره ءِ ملّیں
تونسہ ءُ مُلتان ءَ بگر جست ءَ
گْوستگنت کرن ءُ ده سدانی سال
گْوانزگی تِپل تی منی پچ گُڑنت بیّم ءَ
ننگ نہ انت گامیش یے تئ سیاہیل
جو ہڑاں میسینیت وتا سدبر
روچ رحمانی تو مگند واب ءَ
چہ وتی بستار ءُ گُشاد ءَ گیشں
اے کوه سگاراں گوں گِپتگنت مرداں
نوش ء جان چوں بنت چو تادل ءَ سندھی