او فلسطینءِ دلکشیں بانک
جی تئی نازانی بہا لکّے
من تئی زلپانی زدءَ نیاہاں
نہ چشاں رکانی تئی تامءَ
نہ گراں لنٹاں شیرکنیں بوسے
نہ تئی پادءِ چاراں پادینکاں
نہ تئی دستءِ چوڑی ءُُ گبّاں
کہ منا ڈیہہءِ ترانگاں زرتگ
مکہیں ماتءِ گیر دلءَ نکشنت
سرشپءَ وشیں بَلّیءِ کسّہ
مہرمیں گہارءِ پُچتگیں جامگ
کودکیں براتءِ چیول ءُُ زاری
آ شدیکی ءُُ بزگی واری
من گوں دردواراں مہر گوازینتاں
یات منا انگت ماہکانیءِ
پنت یک کت گوں ہمبل ءُُ بیلاں
دیم پما بست ءُُ کیلگءُُ گواشاں
کت کڑبّانی رون سرجم ما
داشت دل ءُُ چماں گلزمین ماتیں
او فلسطینءِ دلکشیں بانک
بژن تئی پِیریناں دلءِ میلءَ
پہ شرابانی کُچلیں تاساں
پہ جنکانی گرمیں امبازاں
کت بہا ماتیں گلزمین پہکا
کبر نبیّانی زیارت ءُُ پیراں
او فلسطینءِ دلکشیں بانک
من تئی زلپانی زدءَ نیاہاں
نہ چشاں رکّانی تئی تامءَ
نہ گراں لنٹاں شیرکنیں بوسے
من زراں مکرانءِ مزن پنگءَ
پہ وتی شوکیں ہانلءِ مہراں
جامگءَ وش دوچیں بلوچیءِ
سرمگیں بولانءِ یلیں بچاں
گوادر ءُُ شالکوٹ انت منی میراس
بل منی کیسگ ہورک ءُُ ہالیگ انت
بل منی کیسگ ہورک ءُُ ہالیگ انت