شِنگ کن:
روچ شت ءُ ماہ شت اَنت
مھکمیں سال شت اَنت!
پُلّیں امروز نہ شُت !
مئے گَل ءُ بال شُت اَنت
تْرونگلیں ارساں نگْورت
دل شِپیں تیراں نہ سُپت
گورگیں کُلّ ءِ وڈالاں
مئے سر ءُ مال شُت اَنت
مجلس ءُ دوٴر بلوچیگ
شیرکیں گپّ ءُ ھبر
جَلّک ءُ چھر ءُ گداں
گْوپتگیں شال شُت اَنت
چاکرؔ ءِ زور ءُ تیاری
ھانلؔ ءِ ھیسکارگ
رَند چہ شیھ ءَ اِے جھان
مِھر پھوال شُت اَنت
عزّت ءُ جامؔ شت اَنت
شُت اسیلیں پازلؔ
لَبز ءُ گپتار ءُ بیان
گال ءُ سرگال شُت اَنت
گِند ءُ نِند دوستی ءُ براتی
ھوری ءُ ھوریں تپاک
شکلیں دروت ءُ سلام
حال ءُ احوال شُت اَنت