براک ءَ شہ دِھ تیزیں
یک ساڑتیں ساھے
یک دانھے، و آھے
بڑزا عرش روغیں
ماثے ءَ آھیں
که آنھی دیم ءَ
نوخ ورنائیں بچ
میریں هیاتے
ناهق تیرانی دیپان بیثہ
پذی ساھ ماثئے
کُٹ ءَ شہ گڑدین اَنت
پذا موکلائین اَنت
دُریں زبان ءَ شہ
ٹھَؤکے نہ کذئی
چھنڑو چم ماث ءَ
جث ؤ داشتگْ انتی
چماں شہ چُپیں ھور
درکفگْ ایث
اے بے بقائیں
دنیائی ءَ کسو
عربانی سُستی
بگْائی ءَ کسو
دوستانی دروھ و
دغائی ءَ کسو
فلستین ءَ کُلیں
تباھی ءَ کسو
ھمے ماث ءَ آھ و
انڑزی بھوخیں
دھرتی ءَ کھریں و
کھوریں خدایاں
بے باور و اے
لغوریں خدایاں
شہ لاچار بیثہ
و بیزار بیثہ
نیں عرشئے خدایا
را گریے آں گُشانی
زوراخ و زُلماں
اے ٹوپی سرانی
مسلمان ءَ دروھاں
براں بیاں کنانی
عرب عیش ءَ لاف ایں
دوراں کنگْیں
زندے سما نئیں
الئے چوں گُذغیں
عرشئے خدا گِندغیں
وث دے حالاں
فلستین ءَ سیاھیں
شفے ماھ ءُ سالاں
اے مکھیں ماث ءَ
انڑزی رِشوخیں
زمین ءَ پہ روشے
سیلاب ءَ کھار اَنت
ھم ءُ زُلم ءُ دروہے
زوراخی آنی
بے واکی آنی
دل ءِ سختی آنی
اے بتان ءَ دراھ اَنت