شِنگ کن:
شہم پِر بندکن اَنت سگارانی
سینہ کَپ کَپ بنت تلارانی
دلجماں لج ءِ پانگ اَنت وَرنا
پاسپان اَنت وتی گوھارانی
واھگ ءُ اوست مئے ردوم ءَ اَنت
دَھل پیدا ور اَنت ڈگارانی
زُلم ءِ ھنکین ءَ آس ماندار اَنت
شَنگریں آہ شدیگ ءُ وارانی
ارش کُرشی ءُ لَو پُرش اَنت آسر
زار ءُ پَریاتاں بے توارانی
کید ءُ زمزیل ءُ سنکلاں پروش اَنت
سرمچاریں مزار ماتانی
بندی درکاینت شات کامی ءَ
دیر بُنیں بے پدانکیں چاتانی
بور پادمال کن اَنت بلوچانی
بومواں مھکمیں کلاتانی۔۔۔
ھار ءُ ایروپ ءُ شرتگ اِش گون اَنت
رُستگ اَنت توک ءَ گورم ءُ گواتانی
بُن گِر اَنت کوٹ ءُ ماڑی ءُ گواتگِر
بھت پاد کئیت مجیدؔ گدارانی