پہ منا روچ ءِ آزماں دِگرے
روچ ویرانیں ڈاکے ءَ کپتہ
یک ءُ تھنا زمانگ ءِ پاندا
سرجناں سرجناں ، رواں کہ رواں
چِست بنت دنزءُ لُوڈ وھمانی
چونیں دروھاپے چول جنت بُرز ءَ
کمّے دُور اِنت ناں باز نزّیک اِنت
روچ آسے کہ آس نوشان اِنت
شیشگیں برانزاں وھد پروشان اِنت
پُکّی ئیں جمّراں لگوشان اِنت
روچ تھنائیں ڈاکے ءَ کپتہ
من وتی اُمر ءِ ساھتاں جیڑاں
زندگی چونیں اِلّتے باریں
پہ منا روچ ءِ آزماں دگرے
روچ بے نامیں جَنگے ءَ گِپتہ
جنگ باریں کدی ھلاس بہ بیت
باریں شپ چوں تھار بیت باندا
باریں استار روک بنت کہ نہ بنت
کسّے پؤراں ھساب کنت کہ نہ کنت
ماھیں گیوار روک بنت کہ نہ بنت
پاسپان اَنت چِرِت ، توارانی
گُنگیں گویاک گالوارانی
مِِھر ءِ بام ءُ سھیل در کاینت
چاریں پاسانی کِسّہ اِش گون اَنت
روچ بلکیں وتی دل ءَ جیڑیت
کہ شپ ءِ آزماں ، دِگہ ھلکے
بے دیاریں چراگ چمّانی
لئیب کنت گوں مِجازیں استاراں
ماھِکاں پاس جنت وتی شھر ءَ
شپ گشے ایمنیں پناھگاھے
مان پوشتہ تھاری ءَ پوشاک
واب کپتہ زمانگ ءِ ارواہ
ھئو شپ ءِ آزماں دِگہ چیزے
پہ منا روچ ءِ آزماں دِگرے