شِنگ کن:
زَنگ ءَ لیگاریں دریگانی سرا بَزگ بیت
بیا من ءَ تُستگیں کِشکانی ابیتکی تُوریت
لوگی جنجال زِراں ہُشک کناں مہر چی ۓ
اِشک دریائے منی، تُرساں اناگاھ مہ ہوشیت
سَردری، جاک، دگاں پانگی مئے شوک نھاں
جَنگ زَد ءُ گاریں پِت ءِ چُک کَدی لاڈ نَبیت
مھکمی ءَ منی تِر داتہ بَلئے ھستاں من
وتکُشی ائیب نہ اِنت بَس من ءَ مَرگ ءَ تُرسیت
اینچو اوپار چِشیں دار ءَ سَڑینیت کہ بکنت
من ودار ءَ آں کَدی ارس رِچَنت آس مِریت
یکے پہ آجوئی جَنگ ءَ اِنت یکے زندان ءَ
مات باریں نی کجام چُک ءِ مُراداں گِندیت
پہ تَسلہ من وت ءَ رازیگ کناں جاناں بَلئے
اے ابیتکی منی دَست ءَ پہ ھُنر رَد نہ کپیت