شِنگ کن:
زری نوداں کمر بستگ گوں سیاہیں جمبراں مرچی
گروک ءِشہم شہمات اِنت گوں رعدی گُرّگاں مرچی
اے ڈکالیں دل ءِزنگاں پشود ات جی زری نوداں
کن اَنت آباد دل ءِ باگ ءَ ءُ برزیں کوکراں مرچی
دگر قوماں وتی قسمت چے پیم ءَ جوڑ کتگ چار ات
شما تہنا مہ بئیت بزگ او قوم ءِ رہدربراں مرچی
منی پیگور ءُ فریاتاں منی راج ءَ کتگ حرکت
چہ واب ءَ جہہ جتگ بیل ءُ زبان زانو گراں مرچی
وتی گاریں پدو رندان چناں انت سہب بیگاہ ءَ
نہ بیت مشکل اگر دیم ءَ بگند انت سنگراں مرچی
غلام کہ بوتگ انت آزات بہ بنت آزات غلام پرچہ
پکشت قسمتے گومبا ءُ راج ءِ مستراں مرچی
شما پشت کپتگ ات آدمؔ اگر منزل مزن دور انت
گوں حقانیؔ بہ بنت ہمراہ رست گوں ہمراں مرچی