زیادھیں درد ءُ گیشتریں اومان کُش اَنت
بزّگیں شیھؔ ءَ ھانلؔ ءِ سوزمان کُش اَنت
آتکگیں ڈُکّال ءَ نہ کُت ایر جیگ ڈیل منی
ٹیٹل ءِ ٹھلانی من ءَ توپان کُش اَنت
سوھویں مُلّا، زیارتی مُنجار ءُ پکیر
گوں وتی مندراں سرجمیں علمان کُش اَنت
گوالگ ءُ پاتاں وگل کت انت میرانی برنک
بزگراں ھلک ءِ مُشتگیں جوھان کُش اَنت
گواڑگ ءُ پھلانی تلاہ رنگیں دروشم ءَ
کُرّءُ بے واکیں پانگ ءُ باگپان کُش اَنت
دست نہ رسی کہ جوڑ کنت زانت ءَ بے شرپ
کسّی ءَ چوھا، کسّے ءَ گیگان کُش اَنت
ھرچ دپار گاجیل اِنت دپ ءَ وشیں وردن ءَ
کپتگیں مرد ءَ رِتکگیں دنتان کُش اَنت
گلّہ ءُ برنج وت نوش کت اَنت گیگے مِھتراں
ناں پچاں ھورک ءُ ھالیگیں ھِیران کُش اَنت
جمبری شینک ءِ واڈھ ءُ استاگَل اَنت
ماں پرتگاں تش ءُ ہرّگ ءُ سِندان کُش اَنت
گوانزگی گوگاھاں نزانتکاریں بلک ءِ
بندگ ءُ مورت ءُ کُچّلیں درمان کُش اَنت
گْوشت کےءَ، گْونگیں سنگت ءُ براتاں ءَ شوھازؔ
مادریں ھنکین ءِ تھءِ زندان کُش اَنت