شِنگ کن:
گْواتءِ لنکُکاں لَہمیں زیمرے پتاہاں بوت
ہور جنگلءَ سبزیں چادرے پتاہاں بوت
بیگہ یے گوں تئی یاتاں بے کراریءِ کُٹءَ
دردءِ مہلبیں شیئراں شائرے پتاہاں بوت
تَو اِدا اِتے پمّن آزمان ساچان اَت
تَو چِدا شت ئے ذردءَ اشکرے پتاہاں بوت
ہَو پدا ما اولاکءِ اوست چہ دلءَ در کُت
عمرءِ دُور سریں کِشکءَ ہاترے پتاہاں بوت
اہدءِ تُنّگیں چمّءِ ارس پہک نہ کُت کسّءَ
رنگ ءُ روگنیں شہرءَ داں زرے پتاہاں بوت
ما سپر کناں بوتیں دانکہ ہْورک اِتنت چاگل
آزمانءِ دلبندءَ کوہکرے پتاہاں بوت
مُرگ لَڈّ اِتنت مہرءِ بیتواریءَ عادلؔ
زندمانءِ گیاہانءَ سہگرے پتاہاں بوت