کاپورہ

دوشی تو انچو نوک اِت ئے

انچو کہ ائیدءِ نوک بیت

دابءِ کپوتیں شینک تئی بالادءِ آتْراپءَ اِتنت

مُہرگ تْرپوکیں نکش اِتنت پیشانیءِ سنجءَ تئی

شیر لذتیں واہگ گشئے…

پمّن چو ماہکانیں مُرادے رِتکگ اَت

زُلپءِ تنکّیں وشبویے

گْواتءِ سُبکّیں زیمرے

امبازءِ گرمیں مہلباں گوں مینتگ اَت

من چہ جتائیءِ ہمک ذردیں گمءَ ناآشنا

گوں سبزءُ سُہریں موسمانی کدّہاں

نزّیکیءِ واہش تئی گیشتر کتگ

دانکہ ہمے رژنائیءِ چیدگ نگاہاں گْوستگ اَت

من چہ حیالانی دریگءَ ساہتے سر کش اِتگ

گْواچن ہمیش اَت پمّنءَ

تئی دُوریءِ اومان انچو بوتگ اَت

چو مُدّتے روچءِ سرا

یاتانی کاپورہ بہ بیت