شِنگ کن:
نیست منا بوجی یے…
زَریں واباں بہ لَڈّاں وتی
مئیمءِ روکیں چراگانی ارمان تیلگ نہ بنت
نئیکہ ارسانی بے رنگیں پُل سرجہءِ دامنءَ ایر بنت
ہرکسءَ را وتی ہستیءِ بار ماں کوپگاں لَڈّاِتگ
دل منی دُور اُوشتاتہ وہدءِ چَرءَ دست دَنت
زندگیءَ کلوہ یے بکنت
نیست درپے منا…
سُرمہ دانے کناں
موسمءِ رِتکگیں سرمگان ئے تہ ئے مان کناں
تْرانگءِ شیپگءَ گْواتءِ دستءَ دیاں
بلکیں بے دابیں شینکانی چم ئے مُشیت
نیست مُرگے منا…
اوستءِ فیروزہاں وت گْورءَ ئے دیاں
بانزُلاں سنجءِ رنگان ئے نکشانءُ بال ئے دیاں
اُودءِ ڈسءُ نشانءَ اوں حال ئے دیاں
نیست منا توکلے…
ہُشکیں بالادءِ حاکاں بہ میناں گوں جندءَ وتی
ءُ بہ نزّاراں تہنائیءِ ٹُکّراں
بس اُمیتءِ پداں سرگراں
من گوں دیوانگیءَ وتی
روچے سر باں بگندئے تئی واہگءِ کندیءَ