شِنگ کن:
شنزاِتگ ہورءَ دمانے پدا واہر بوتگ
مُرگاں نازینک جتگ پُلاں شکر پِر بوتگ
کسّے گْوستگ منی بے رنگیں نگاہاں انچو
صورتے پْرشتگیں آدینکیءَ زاہر بوتگ
سْرپتگنت شیئر اِدا وشبو ءُ رنگانی تہا
تَو کہ ہر پُلءِ بدن دَزجتہ شائر بوتگ
مُرگے است اَت، نہ تیابے، نہ شِپیں بوجیگے
مُدّتیءَ منی چمّانی تہا زِر بوتگ
پہ تئی لیبوئیں بچکندءِ بلوریں شہمءَ
دل چو زہگءَ منی دَمکانی تہا گِر بوتگ
روچے الّم من شُہازاں وتی جاہءَ عادلؔ
نُوں اے کِشکءَ منی دیوانگیں سر پر بوتگ